رواية يوميات مراهقة كاملة جميع الفصول بقلم ايمان شلبي
رواية يوميات مراهقة كاملة جميع الفصول هى رواية من تأليف المؤلفة المميزة ايمان شلبي رواية يوميات مراهقة كاملة جميع الفصول صدرت لاول مرة على فيسبوك الشهير رواية يوميات مراهقة كاملة جميع الفصول حققت نجاحا كبيرا في موقع فيسبوك وايضا زاد البحث عنها في محرك البحث جوجل لذلك سنعرض لكم رواية يوميات مراهقة كاملة جميع الفصول
رواية يوميات مراهقة كاملة جميع الفصول
-ما تحبني
-نعم!
ابتسمت ابتسامه حزينه وانا ببصله :
-حبني يامحمد
ابتسم ابتسامه مهزوزه وهو بيحاوط كتفي بمرح :
-طب مانا بحبك مش انتي بنت خالتي
شيلت أيده وانا بهز راسي :
-لا حبني بجد
رد باستغراب :
-يعني ايه احبك بجد
-يعني حبني حب من نوع تاني
-انا مش فاهم منك حاجه انتي ليه بتتكلمي بالالغاز!
اتنهدت تنهيده طويله كلها حزن وانا بسند ايدي علي سور البلكونه وببص قدامي :
-هي احسن مني في ايه عشان تحبها الحب ده كله
-هي مين ديه
رفعت راسي وانا ببص في عيونه بعيون بتلمع بالدموع :
-شروق احسن مني في ايه عشان تحبها
ملامح وشه كانت موضحه قد ايه مصدوم من الكلام اللي بقوله ،فضل يبصلي بدهشه واستغراب والحروف طارت من علي لسانه
طال الصمت الممزوج بعلامات الاندهاش والصدمه لحد ما قطعته وانا بقرب منه وبحاوط وشه بجراءه
-انا بحبك يامحمد
نفض ايدي بكل قوته وهو بيبصلي بأحتقار وقرف :
-انتي بنت قليله الادب وعايزه تتربي
-قليله الادب عشان بقولك بحبك
مسك دراعي وهو بيجز علي أسنانه بغيظ :
-تعرفي ايه عن الحب انتي يامفعوصه ياللي مكملتيش ١٨ سنه ،وبعدين انتي اصلا ازاي تقوليلي حاجه زي كده وانا واحد خاطب وبيحب خطيبته انتي فعلا متربتيش ومحتاجه تتربي من اول وجديد
عيطت من كتر الوجع بسبب أيده اللي كانت مغروزه في أيدي
-ا انا معملتش حاجه غلط انا حبيت
-لا غلط وستين غلط كمان ،اياكي ياكنزي ايااااكي اسمعك بتقولي الكلام ده مره تانيه هدفنك مطرحك انتي سامعه
قال جملته الاخيره بصوت عالي هز البيت وانا واقفه بترعش بين ايديه وبهز راسي بخوف
-حاضر حاضر أنا اسفه
نفض ايدي وبصلي بأحتقار من فوق لتحت وهو بيقولي بقسوه:
-ادخلي اتخمدي عشان عندك مدرسه بكره ياهانم ،ركزي في مستقبلك بلا حب بلا كلام فارغ وقله ادب
وبعدها سابني وخرج
وقفت ابص لآثره بقهره ووجع في قلبي
عمري ما كنت اتخيل اني يوم ما احب شخص يبقي الشخص ده محمد ابن خالتي
طول عمري كنت بشوفه اخ ،صديق، اب من بعد وفاه بابا
عمري ما كنت اتخيل أن يوصل بيا الحال لدرجه الحب الأسطوري اللي بشوفه في الافلام والروايات
انجرفت ورا مشاعري يوم ورا التاني ورا الثالث محاولتش اوقف حُبي ليه بالرغم اني عارفه أنه خاطب وبيحب خطيبته !!
وفي النهايه اخدت اللي استحقه
تهزيق، كرامه متهانه ،وجع قلب ،حزن لا متناهي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-خلاص ياكنزي كفايه عياط كنتي متوقعه يقولك ايه يعني وانا كمان بحبك ،انتي عارفه من البدايه أنه خاطب وبيحب خطيبه وأنه عمره ماشافك غير اخت وبس
-انا غبيه غبييييه مكانش لازم اعترف بحاجه زي كده واكتم جوايا
مسكت ايدي وهي بتبصلي بحزن :
-لا كويس انك عملتي كده عشان متفضليش واهمه نفسك بحاجه مش بتاعتك
-تفتكري محمد هيكرهني بعد اللي حصل
ابتسمت وهي بتهزلي رأسها بنفي :
-متوصلش لدرجه الكره هو هيفضل زعلان منك شويه وبعد كده خلاص
-انا هينت نفسي وكرامتي اوي
-محدش بيتعلم بالساهل ،يلا يلا قومي اغسلي وشك عشان ننزل الدرس مستقبلنا اهم من اي حاجه
هزيت راسي وقومت غسلت وشي وانا مقرره من جوايا اني انتبه لدراستي واتفوق واشيل اي حاجه من دماغي عشان اوصل للي نفسي فيه
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-هو مستر ” نوح ” بيبصلك كده ليه
بلعت ريقي بخوف وانا بهمس لرنا صاحبتي :
-مش عارفه انا معملتش حاجه والله
– كنزززي قومي اقفي أنتي وصاحبتك
بصينا انا ورنا لبعض بتوتر وخوف وقومنا وقفنا
بصلي بصه رعبتني وخلت جسمي كله يتنفض من الخوف
-انا كنت بقول ايه
بلعت ريقي بصعوبه :
-ك كنت بتقول ك كنت
ضحك باستهزاء :
-طبعا وانتي هتعرفي منين وانتي عماله تتكلمي مع الهانم اللي جنبك
-انا انا اسفه يامستر بس
-اطلعي برا انتي وهي
رنا بتوتر :
-احنا اسفين يامستر نوعد حضرتك انها تكون اخر مره والله
زعق فينا بعصبيه وهو بيرمي القلم علي الارض :
-قولت برررررررا
طلعنا انا وهي واحنا بنجري من القاعه بأحراج ودموع ــــــــــــــــــــــــــــــــــــــــــــــــــــــــــــــــــــــــــــــــــــــــ
-والله ما هعديله اللي عمله ده هخليه يندم أنه زعقلي
رنا بقلق وعيونها حمراء من كتر الدموع :
-هتعملي ايه
بصيت حوليا وانا بفكر وفجأه لمحت عربيته
بصتلها بعيون بتلمع بشر :
-هعمل كل خيررر
قولت جملتي وطلعت اجري عليها وهي بتجري ورايا بخوف
-هتعملي ايه يامجنونه استني
بعد مرور خمس دقايق
رنا وهي بتحط ايديها علي بوقها:
-يانهار مش فايت ايه اللى انتي بتقوليه ده لا طبعا استحاله اعمل كده في عربيه الراجل !
بصيت للعربيه بفخر :
-ياستي عادي وبعدين مش خساره في طيبه قلبه
-انتي عارفه لو شاف خدش واحد في عربيته هيعمل فيكي ايه
رديت بلا مبالاه:
-وهو هيعرف منين أنه انا ؟؟
-علي أساس أنه مش هيستنتج يعني أنك انتي اللي عملتي كده
-بقولك ايه يعمل اللي يعمله انا مش بخاف من حد اصلا انا لا بحبه ولا بحب الحصص بتاعته ولا بحب الماده بتاعته
-اه
-بني آدم مغرور وشايف نفسه
رنا وهي بتبص ورايا ووشها كله اصفر :
-كنزي
-هو يعني عشان البنات بتجري وراه وبتتغزل في جماله مفكر نفسه اخر قطعه في الكيمو كونو !
-ك كنزي
-طب علي فكره بقي مش حلو وودانه شبه القرد و بيجعر زي الحمار
-حمار
ضحكت بذهول :
-ايه ده انتي بتعرفي تقلدي صوته
كانت علي وشك انها تعيط وهي بتشاورلي بعنيها اني ابص ورايا بس انا اللي غبيه ومكنتش فاهمه
-مالك يابنتي في ايه
-ا احم كنزي ا اصل ا اصل
-اصل ايه يابنتي
لقيته مره واحده ظهر قدامي وهو بيبتسم ابتسامه صفراء
-مساء الخير يافندم اصل الحمار كان واقف وراكي ،كنتي بتقولي ايه بقي عشان مسمعتش كويس
بلعت ريقي بصعوبه وانا برجع خطوه لورا وبهمس بخوف
-جالك الموت ياتارك الصلاه
وفجأة عيني احولت،وحسيت بطشاش وصداع رهيب وغمضت عيني وانا بستسلم لفقدان الوعي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
فتحت عيوني ببطئ ولفيت راسي لقيته قاعد علي كرسي وحاطط رجل علي رجل وهو بيبصلي بملامح خاليه من اي تعبير
اتنفضت من مكاني وانا ببص حوليا بخوف :
-انا فين
رد بجمود :
-في المستشفي
بلعت ريقي وانا ببص علي المحلول اللي كان متعلق في أيدي
-ل لو سمحت خليهم يجوا يشلولي المحلول ده انا عايزه امشي
هز رأسه ببرود :
-مفيش خروج الا لما المحلول يخلص
-بس انا عايزه امشي
-وانا قولت لا
اتعصبت وانا ببصله بغضب :
-انت ملكش حكم عليا
-لا ليا
-بمناسبه ايه أن شاء الله ليك ،اخويا ،ابويا ،خطيبي ،جوزي!!!
-ميمشيش معاكي مدرسك وبيعتبرك اخته الصغيره وخايف عليكي
عيوني لمعت بالدموع :
-اه بأماره لما زعقلتي واحرجتني قدام الطلاب كلهم
اتنهد تنهيده طويله وهو بيبصلي بأسف :
-اسف
-هه
-بقولك انا اسف
حطيت عيني في الأرض بأحراج وانا بفرك ايدي بتوتر :
-ا انا ا انا كمان اسفه علي الكلام اللي قولته
ابتسم بهدوء :
-اسفك مقبول
-انت ازاي كده
-كده اللي هو ايه
-انت ا انت طلعت شخص طيب ولطيف وجنتل و
قاطعني بأحراج :
-ا احم انا خارج برا شويه وراجعلك
عيطت وانا بهز راسي بنفي :
-لا ارجوك خليك معايا
رد بقلق :
-انتي بتعيطي ليه
-عشان زعلانه اوي
قعد علي طرف السرير وهو بيبص في عيوني بحزن :
-ايه رأيك تعتبريني اخوكي الكبير وتحكيلي
سكت لحظه وانا ببصله بحيره وبعدها هزيت راسي بدموع
-هحكيلك
↚
سكوتك عن ما لا يرضيك ،
تنازلاتك الأولى ،
تغاضيك عن ما أتعبك ،
إخفاءك لرفضك ،
تحملك كتمانك ،
جميعها صلابة لم تؤلم أحدا سواك.
كان اكتر اقتباس شوفته قادر يعبر عن كل الكلام المكتوم جوايا
بالرغم اني حكيت كل اللي جوايا لنوح إلا أني مرتحتش علي الاطلاق وكأن الحمل زاد الطاق!
وكأن في جبل علي قلبي
وقتها مسمعتش منه كلام يرضيني أبداً
بل بالعكس هو حتي نظرته ليا اختلفت تماماً من اليوم ده
قالي كلام مفيش قلب ممكن يستحمله
لسه كلامه اللي قاله بكل قسوه بيتردد في ودني
-انتي مش صح
-انتي كده بنت مش كويسه أبداً
-تصدقي كنت بحترمك لكن دلوقتي نزلتي من نظري !
-امممممم حربايه عايزه تخطفي واحد من خطيبته
-بقولك ايه قومي قومي اوصلك البيت بلاش كلام فاضي وشغل عيال
ضحك بسخريه:
-قال عايزه تطلع دكتوره قال هه ابقي قابليني لو وصلتي لحاجه أنتي اخرك تتجوزي وتعلقي شهادتك علي الحيطه
وقتها ندمت ندم عمري اني حكيتله
مكانشي اول شخص اثق فيه ويخذلني
تقريباً كان الشخص المليون
يمكن كنت تايهه في حياتي عشان مش لاقيه الشخص اللي ينصحني
يمكن مكنتش بقدر اتحكم في مشاعري وكل شخص بقابله يهتم بيا أو يحسسني أني فارقه قلبي يحبه ويجري وراه زي المجنون
يمكن كنت بعمل كده لاني كنت محتاجه الحنان اللي بجد!
فوقت من ذكرياتي وانا بتنهد بحزن وبمسح دموعي
شويه ودخلت خالتو عليا الأوضه وهي بتقرب مني بابتسامه :
-صباح الخير يادكتوره
-صباح النور ياخالتو
-ها مستعده لاول يوم في الكليه
رديت بحماس :
-جداااااا
بصتلي بحزن :
-محمد كان نفسه هو اللي يوصلك اول يوم في الكليه بس …
قاطعتها بابتسامه بهتانه:
-عارفه ياخالتو ،عارفه أن مراته مش بتحبني ولا بتحب سيرتي حتي ،لكن حقها
-نفسي افهم هي ليه مش بتحبك مع أن كل اللي يشوفك يحبك ازاي هي محبتكيش
-حقها ياخالتو انا لو مكانها هغير انا مش اخت نوح انا بنت خالته يعني نجوز لبعض
ضحكت وهي بتحضني :
-عارفه يابت ياكنزي لو كنتي بس كبيره شويه كنت جوزتك الواد محمد
ابتسمت بحزن وانا بفتكر اللي حصل اول ما اعترفت بمشاعري لشخص مقدرش يفهمني أو حتي يرفضها بلطافه ومن غير ما يكسر قلبي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-رايحه فين يابنتي ده مش طريق الكليه؟
ابتسمت ابتسامه جانبيه وانا بحط النظاره فوق عيني وبسوق العربيه اللي ماما جابتهالي بمناسبه نجاحي في الثانويه العامه وبعدها رجعت لجوزها اللي اتجوزته بعد بابا وسابتني لوحدي من تاني
-هعمل كام مشوار كده
رنا بقلق :
-ايه هما ؟!
غمزتلها بمشاكسه:
-فاكره مستر نوح ؟؟
بصت قدامها بغيظ :
-طبعا وهو يتنسي ،مش قادره افهم لحد دلوقتي ليه منعنا أننا نحضر الحصص بتاعته
عيوني لمعت بالدموع وانا بفتكر كلامه
-عشان زي ما قولتلك انا حكيتله
↚
-بس ده مش مبرر أنه يمنعنا أبداً !
-مش مهم دلوقتي المهم اني اروح أقابله
-ليه ياكنزي فهميني اللي في دماغك
ابتسمت :
-اصل هو اليوم ده قالي ابقي قابليني لو دخلتي كليه الطب
بصتلها وانا ببتسم ابتسامه صفراء:
-واهو رايحه أقابله
مسكت ايدي وهي بتبتسم بتشجيع:
-انا فخوره بيكي اوي
-ربنا يديمك ليا لولا وجودك ووقوفك جنبي انا كنت فعلا هنهار
-مفيش حد يستاهل نقع أو نفشل عشانه
-صح
وصلت قدام السنتر اللي بيشتغل فيه ونزلت انا ورنا من العربيه ودخلنا سألنا عنه قالولنا انه في مكتبه
رنا وهي بتضغط علي ايدي وبتطمني:
-انا هستناكي هنا
هزيت راسي بتوتر :
-لا تعالي معايا
-توء خليكي شجاعه وواجهيه وعرفيه انك مش فاشله يلا
اخدت نفس عميق وانا بخبط الباب
ثواني وسمعت صوته بيسمحلي بالدخول
فتحت ودخلت وقلبي بيدق بسرعه وخوف
اول ما شافني قام وقف وهو بيبصلي وقال بجمود :
-كنزي
بلعت ريقي ورديت بصوت مهزوز :
-ا ازيك
رفع حاجبه ببرود :
-كويس خير اتفضلي
حسيت أن شجاعتي في الوقت ده وكل الكلام اللي كنت محضراه اتبخر حرفياً !!
خرج من ورا مكتبه وقرب مني لحد ما وقف قدامي :
-سامعك
بلعت ريقي وحاولت استجمع شجاعتي :
-انا ا انا
-انتي ايه ياشطوره
رديت بسرعه وانا بفرك ايدي بتوتر :
-انا دخلت كليه الطب
ابتسم ابتسامه جانبيه وهو بيربع أيده :
-عارف
-عارف؟؟
-اه
-عرفت منين
-مش لازم تعرفي
رفعت حاجبي باستغراب :
-انت مراقبني
-امممم تقريبا
-ليه
-عايزه الصراحه
-اكيد
قرب مني وهمس في ودني بنبره خلتني اتنفض:
-عشان بحبك
رجعت خطوه لورا وانا بهز راسي بصدمه
-ا انت قولت ايه
-انا بحبك يا كنزي و ….
قاطعته بعصبيه :
-اسكت اخرررس خالص انت مش بتحبني لا لا انت مش بتحبني مفيش حد بيحب حد بيسيبه وقت حزنه وخوفه وعجزه عن أنه يتجاوز محنته!!
ا انت مرحمتنيش يا نوح ،ل لما لما قررت افتحلك قلبي واعتبرك اخ ليا مرحمتنيش وقولتلتي كلام مفيش قلب ممكن يستحمله ا انا ا انا
قرب مني فجأه ومسك دراعاتي الاتنين وهو بيبص في عيوني وقال بقوه :
-انا عملت كده عشان تفوقي لنفسك ،كان لازم اكون قاسي عليكي عشان حزنك ميطولش وتضيعي وقت علي الفاضي في حزن علي شخص ميستاهلش
لولا اللي عملته صدقيني مكنتيش هتوصلي لحاجه ،انتي عملتي كده عشان تتحديني وتعرفيني انك مش فاشله وهو ده اللي انا كنت عايز اوصله
ضحكت بسخرية :
-انت فاكر أن كلامك ده هيخليني افرح واطير وقلبي يدق واقولك بحبك ،هه تبقي غلطان يااستاذ نوح
عمر القسوه ما كانت حل ابداً
ضغطت علي ايدي وعيوني بتلمع بالدموع :
-عمري ما انسي كلامك ليا وقتها ،عمري ما انسي نظرتك ليا ،عمري ما انسي انك خذلتني بعد ما قررت اثق فيك وافتحلك قلبي
↚
وقتها كان في اعتقادي انك هتفهمني ،هتقولي كلمتين يطيبوا خاطري ،هتقف جنبي وكأني اختك الصغيره لحد ما اتجاوز المحنه دي ،لكن انت اخترت الحل اللي كسرني ورجعني لنقطه الصفر من تاني ،عمري ما هسامحك أبداً
اخدت نفس طويل ومسحت دموعي وخرجت من المكتب وانا مقرره انسي كل اللي حصل وابدء حياتي الجديده المختلفه تماماً عن حياه الطفله المراهقه اللي عانت اللي خرجت مشاعرها لكل شخص كان بيقابلها ويحسسها ولو بشويه اهتمام !
ولكن عزيزي القارئ
•رغم كل شيئ نقوله او نكتبه يبقى في القلب أشياء أكبر من أن تُقال”
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-يعني هو قالك انا بحبك ؟
-اه
-وانتي رفضتي ازاي بجد
رفعت حاجبي باستغراب :
-وانتي عايزاني اوافق بعد اللي قاله يارنا
-ياستي مكانوش كلمتين قالهم وبعدين الراجل كان خايف علي مصلحتك
-لا طبعا خايف علي مصلحتي يقوم يعمل كده !!
عمر القسوه ما كانت حل يارنا
كانت لسه هتتكلم بس الدكتور دخل ….
-ايه ده سليم
رنا بهيام :
-انتي تعرفي القمر ده؟
-ده ابن جوز ماما
-حلو أوي أوي
بصيتله بقرف:
-ياساتر حلو اي ده بارد
-اصلا
-لا انا ولا هو بنطيق بعض
-الاه!
-والله …كل مره بشوفه بندب خناقه لرب السما
-ليه يابنتي ؟؟
-عشان هو مغرور يابنتي
“انتي يا انسه قومي اقفي ”
بلعت ريقي وانا ببص حوليا بأحراج وقومت وقفت بتوتر
-ن نعم يادكتور
-انا كنت بقول ايه دلوقتي ؟
-ولا حاجه كنت بتعرفنا علي نفسك و عن انجازاتك في امريكا واليونان وكل بلاد العالم اللي سافرت فيها ،سوري يادكتور مكانش عندي خلق اسمع كل ده عشان دماغي وجعاني
-والله!
-اه والله لما نبدء المنهج أن شاء الله هركز جامد جداً
ابتسم وهو بيرفع حاجبه باستفزاز:
-مش لو حضرتي المحاضرات تبقي تركزي
-يعني ايه
ملامح وشه اتغيرت وبصلي بصه مُرعبه :
-يعني اتفضلي اطلعي برا ومتحضرليش اي محاضره لحد آخر السنه
اتعصبت ورديت بغيظ:
-احسن برضو بدل ما الواحد يقوم يصطبح بوشك البومه
اتعصب وعيونه بقت حمرا من كتر الغيظ واتحرك نحيتي
بلعت ريقي وانا بهمس بخوف :
-هي مالها بردت كده ليه ،جالك الموت ياتارك الصلاه
↚
قولت جملتي وطلعت نطيت علي البينش وانا بشاورله بصباعي
-اقف مكااانك لتولع
جز علي أسنانه وعروق رقبته برزت :
-ده انا هعمل منك شاورما
ابتسمت ابتسامه مهزوزه :
-حلو بس متنساش الكاتشب عشان بحبه الله يخليك
كان خلاص قريب مني قومت نطيت علي البنش اللي قدامي وفضلت انط لحد ما قدرت أهرب من المدرج
كل ده طبعا بعد ما المدرج كله ضحك عليا وعلي جناني
اخدت نفس عميق وانا بتنطط بفرحه :
-الحمد لله فلت منييييهم
وفجأة حسيت بالكارثه المهببه اللي عملتها
لطمت علي وشي :
-احيه يابو سوسو احييبه شيلت الماده
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-انا جيالك ورقبتي قد السستمه انتي وعمو صلاح وعايزاكم تنقذوني ياماما
ماما بقلق :
-في ايه ياحبيبتي ايه اللي حصل
بلعت ريقي بتوتر :
-ب بصي بصراحه كده يعني ا انا عملت كارثه في أول يوم ليا في الكليه وهشيل الماده
-كارثه ايه يابنتي ايه اللي حصل !
-ب بصراحه كده ياعمو صلاح انا هزقت عم هولاكو في المدرج
صلاح باستغراب :
-مين عمم هولاكو ده
-ابنك ياعمو ركز معايا
ضحك هو وماما علي التشبيه اللي شبهته بيه وهما بيبصوا لبعض
كنت علي وشك اني اعيط من كتر التوتر والخوف
-انتوا بتضحكوا علي ايه انا فعلا عملت كارثه وابنك هيشيلني الماده
-ايه اللي حصل طيب احكيلي بالتفصيل
حكيتله كل اللي حصل بالتفصيل وهو وماما مع كل كلمه كانت علامات الصدمه تبان علي وشهم لحد ما خلصت
صلاح بذهول :
-انتي قولتيله بومه
هزيت راسي بتأكيد :
-وخليت المدرج كله يضحك عليه وهو بيجري ورايا شبه ألاهبل
-اهبل!!
بلعت ريقي بتوتر وخوف :
-ا اي ده ياعمو هو حضرتك بتعرف تقلد صوت عم هولاكو كمان
-وهولاكو
-الاه !
وفجأة لقيته واقف قدامي وعيونه بتطق شرار
قومت اتنفضت :
-الاه انت مش كنت في المدرج ايه اللي جابك هنا ،ا انت دخلت ازاي اصلا ومحدش حس بيك انت عفريت ؟
زعق فيا :
-انتي ايه اللي جابك هنا ؟
اتعصبت وبصيت في عيونه بتحدي:
-وانت مالك
صلاح وماما في صوت واحد :
-احيه
رفع حاجبه وضحك بسخريه:
-وانا مالي ؟
-اه انت مالك أنا جايه لامي
-بس البيت ده بيتي
-لا ده بيت عمو صلاح
-وانا ابن عمو صلاح والبيت بيتي ويلا اتفضلي من غير مطرود
بصيت لماما وعيوني بتلمع بالدموع وهي كمان بصتلي بقله حيله
↚
مكانتش قادره تنطق حرف ولا تدافع عني
اصل هتقول ايه
ما هو عنده حق فعلا ده مش بيتي ولا ليا اني أدخله من غير إذن أصحابه
اتنهدت وانا بمسح دموعي وباخد شنطتي وكنت لسه هخر ج وقفني صلاح
-استني ياكنزي
قرب مني ولف وقف قدامي وهو بيبتسم بحنان :
– متمشيش البيت ده بيتك ياحبيبتي واي حد يقول غير كده يتفضل هو يخرج برا
قال كلامه وهو بيبص لسليم بغضب وعتاب …
سليم بغيظ :
-بس يابابا …
قاطعه بجمود :
-متتكلمش
مسحت دموعي وانا ببص في الأرض بأحراج :
-لا ياعمو البيت ده مش بيتي وانا اسفه اني اتعديت حدودي وجيت لحد هنا من غير استأذان
ورفعت وشي وانا ببص لسليم وبقوله بنبره مخنوقه بالعياط
-انا بعتذر علي اللي حصل النهارده واتمني تقبل اعتذاري ومتشيلنيش الماده لو سمحت يا دكتور سليم
قولت كلامي وكنت لسه هخرج سمعت صوته بيرد بهدوء
-اسفك مقبول
هزيت راسي بابتسامه باهته :
-شكرا
-انا كمان
رديت باستغراب :
-انت كمان ايه !
-انا كمان اسف ،البيت بيتك اتفضلي في أي وقت
رديت بهدوء :
-متشكره عن اذنكم
ماما بلهفة:
-كنزي
-نعم ياماما
قربت مني وهي بتقولي بتوسل :
-عشان خاطري خليكي معايا شويه ملحقتش اشبع منك
بصيتلها وعيوني مدمعه وانا بهز راسي بنفي :
-انا اسفه لازم امشي عشان خالتو متقلقش عليا
-كنزي انا….
قاطعتها بجمود:
-ارجوكي ياماما متفتحيش معايا الموضوع ده تاني صدقيني انا مش هقدر اعيش معاكي
-ط طب علي الاقل خليكي بايته معايا النهارده عشان خاطري ياكنزي وحشتيني اوي نفسي اخدك في حضني زي زمان
عيطت بعد ما خلاص فاض بيا من كتر الكتمان واترميت في حضنها وانا بدفن نفسي بين دراعاتها
-وحشتيني اوي ياماما اوي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
بليل كنت واقفه في البلكونه وحاطه الهاند فري في ودني ومعليه صوته
-شكلك بتحبي عمرو حسن
لفيت لمصدر الصوت واللي كان سليم
حطيت وشي في الأرض بخجل
-اه
-احم ط طب ايه مش هتتعشي معانا
-ل لا شكرا انا مش جعانه
قرب نحيتي وسند أيده علي السور وهو بيبص قدامه :
-ولا انا
اتنهدت وكنت لسه هخرج من البلكونه بس اتفاجئت بسؤاله
-هو انتي ليه بتكرهيني؟؟
رمشت بعيني اكتر من مره وانا بحاول استوعب سؤاله وبعدها رديت بذهول
-ليه بتقول كده ؟
-لانك بتكرهيني
ضحكت وانا بهز راسي بذهول :
-انا اللي بكرهك ولا انت اللي كل ما تشوفني تتخانق معايا
بصلي وحك رأسه بأحراج :
-تصدقي انا فعلا كنت سخيف معاكي
قربت منه ووقفت اسند ايدي علي السور وانا ببص قدامي وبسأله بحيره :
-تفتكر عشان امي اتجوزت ابوك
-وايه العلاقه
-انك اكيد مش طايق ماما لأنها اخدت مكان مامتك الله يرحمها وبالتالي مش طايقني
-لا طبعا أنا بحب مامتك جدا
-بجد
-والله ،وبعدين كل انسان محتاج اللي يسنده مامتك وبابا معملوش حاجه غلط
رديت بشرود:
-اه
-انتي بتكرهي بابا عشان كده بتكرهيني زيه
عيوني لمعت بالدموع وانا بهز راسي بنفي :
-لا والله مش بكره عمو صلاح ،ا انا بس انا كل ما افتكر بابا وماما وانا لما كُنا عايشين في بيت واحد وكنا اسعد اسره بتعب لكن انا فعلا عمري ما كرهت عمو صلاح ابدا !
مسك ايدي بتلقائيه وهو بيبتسم ابتسامه لطيفه :
-الله يرحمه ويرحم ماما يارب
جسمي اتنفض من لمسته وهزيت راسي وانا ببتسم ابتسامه مهزوزه وبسحب ايدي :
-ي يارب
-افهم من كده انك مش بتكرهيني
هزيت راسي بابتسامه صافيه:
-لا اتمني ان انت كمان متكونش بتكرهني
-ابداً والله انا بس قفل شويه معلش
ضحكت جامد انا بقوله:
-انت صريح اوي
↚
-اكذب يعني !
-لا طبعا
ضحك ومدلي أيده بابتسامه جميله خطفت قلبي تقريباً!
-نبقي صحاب ؟!
مديت ايدي وانا ببتسم :
-نبقي صحاب
-احكيلي بقي
رديت باستغراب :
-احكيلك ايه
-احكيلي عنك
-اسمي كنزي ،عندي ١٩ سنه ،كان حلمي ادخل كليه الطب والحمد لله دخلتها ،بحب القراءه جدا ،بحب الرسم ،بحب الشعر ،بحب الاكل وبصراحه كده هو نقطه ضعفي
ضحك وهو بيخبط كفي في كفه :
-بصره طلعنا متفقين في تلت حاجات
-ايه هما
-الشعر ،والاكل ،وحلمنا كليه الطب
-اممممم وانت احكيلي عنك
-اسمي سليم ،عندي ٢٦ سنه ،كان حلمي ادخل كليه الطب ودخلتها ،بحب الشعر ،بحب المشي ،بحب الاكل ،بحبني اوي
ضحكت وانا برفع حاجبي :
-انت نرجسي بقي
-توء توء واثق من نفسي
-ماشي ياعم الواثق
ضحك وسكتنا لحظه واحنا بنبص قدامنا وفجأه لفينا احنا الاتنين واحنا بنسأل نفس السؤال لبعض
-عمرك ارتبطت؟
-عُمرك ارتبطي؟
ضحكت وهو كمان ضحك وبصينا لبعض لحظه وبعدها جاوبنا بهدوء
-لا
-لا
رفع حاجبه بذهول:
-معقوله عمرك ما ارتبطتي؟؟
-اه
-ولا حبيتي
سكت لحظه ومر علي عقلي اليوم اللي حكيت فيه لنوح عن مشاعري واعتبرته اخ وفي الآخر خذلني
من وقتها وانا مقرره اني عمري ما هقول سري لاي شخص أياً كان هو مين
اتنهدت وانا بهز راسي بابتسامه :
-لا
-متأكده؟؟
-اكيد ،طب وانت
-خطبت مره
-وايه اللي حصل
رد بملامح خاليه من اي تعبير :
-سيبنا بعض
-طب وايه السبب
-مكانتش شبهي
-ازاي
-يعني كانت مختلفه معايا في كل حاجه ،كل ما كنت اقولها علي حاجه لا كانت تعاند معايا وتعملها ،بالرغم انها قبل الخطوبه كانت كل حاجه تقولي حاضر ونعم وبكل اقتناع انا عمري ما فرضت عليها رأي ابدا كنت بتكلم معاها وبحاول أقنعها واعرفها اسباب رفضي للشئ الفلاني عشان كذا وكذا لاني كنت بخاف عليها بس هي مكانتش فاهمه ده
كانت طماعه ،وانانيه تحب تاخد ومتديش !
-معقوله مظهرش كل ده قبل الخطوبه
-تخيلي
-ربنا يعوضك خير يارب
-يارب
-بقولك ايه انا زهقانه
-بقولك ايه وانا كمان جدا
-طب ايه؟
-تحبي ننزل نتمشي شويه
رديت بحماس :
-بجد
ابتسم بحنان :
-بجد
-وناكل ايس كريم
-عيوني ليكي
-ونروح الملاهي
حك فروه رأسه بأحراج :
-احم ملاهي!
بصيتله ببراءه:
-بليز ياسليم نفسي اوي من زمان اروح الملاهي
-ولو أن وجود دكتور زي في الملاهي لا يليق بمركزي بس عشان خاطر عيونك موافق
وقفت اتنطط في مكاني بفرحه وانا بمسك أيده بتلقائية:
-شكرا شكرا بجد
ابتسم وهو بيقولي بحماس :
-يلا بينا
ــــــــــــــــــــــــــــــــــــــــــــــــــــــــــــــــــــــــــــــــــــــــــ
كُنا بنتمشي علي البحر وفي نسمه هواء لطيفه بتخبط في وشي وبتطير شعري بعشوائيه
كل ثانيه ايدي كانت تلمس أيده من غير قصد لا مني ولا منه وفجأه وبدون اي مقدمات لقيته بيشبك صوابعه في صوابعي
رفعت عيوني ابص في عيونه ووشي كله احمر من الاحراج والتوتر
ابتسم ابتسامه رقيقه خلت قلبي يرفرف وتلقائياً ابتسمت انا كمان وكملنا طريقنا واحنا شابكين ايدينا في ايد بعض وكأنناً اتنين عاشقين
-احساس لطيف اوي
رد باستغراب :
-ايه هو ؟
-الحنيه احساس لطيف ومفيش اجمل منه
-طبعاً
-هقولك حاجه بس متضحكش عليا
-قولي
-انا من زمان اوي كان نفسي اتمشي علي البحر مع شخص وناكل ايس كريم ونرغي في أي هري ،ونجري ونلعب ونتنطط لحد ما نتعب وفي الآخر يجبلي هديه ويوصلني البيت ويقولي أنه كان مبسوط اوي النهارده معايا ويبوس ايدي ويقولي بحبك و….
↚
وقفت كلامي فجأه لما أدركت اني كنت عفويه زياده عن اللزوم مع شخص معرفهوش !
اما عنه كان واقف قدامي بيبصلي بابتسامه غريبه مرسومه علي وشه وكأنها ابتسامه اعجاب علي ما اظن
-وقفتي كلام ليه؟
بلعت ريقي بتوتر وصعوبه :
-هه
-بقولك وقفتي كلام ليه كملي
-لا فكك فكك
-طب يلا
-يلا ايه
غمزلي بمرح :
-يلا نعمل كل اللي قولتي عليه دلوقتي
رديت بحماس :
-بجد
-يلا بينا مفيش وقت للتفسير
قال جملته وطلعنا نجري زي الاطفال واحنا ماسكين ايد بعض …
اول حاجه روحنا الملاهي وفضلنا نلعب كل الالعاب الموجوده
وفي الحقيقه لاول مره احس ان حد حنين عليا بالشكل ده
سليم كان شخص مختلف تماماً عن الشخص بتاع كل مره
كان لطيف ،حنين ،طفل علي هيئه شخص كبير!
كان كل لعبه نلعبها يتأكد قبل ما تشتغل اني قاعده كويس ومأمنه نفسي
كان خايف عليا وكأني بنته
كان كل ما يشوف خوف في عيني يمسك ايدي يطمني بابتسامه جميله زي قلبه أنه معايا وعمره ما هيسيبني اقع
خلصنا كل الالعاب ،اكلنا ايس كريم وذره ،واتمشينا علي البحر لحد ما تعبنا ،فضلنا نرغي في أي هري
كنت مبسوطه بشكل ميتوصفش
لاول مره احس اني رجعت طفله تاني
اتنهد بتعب وهو بيسند علي سور البحر :
-كده عملنا كل اللي نفسك فيه صح ؟
ابتسمت بأمتنان:
-صح
-بس فاضل حاجه واحده
-ايه هي ؟
ابتسم ومسك ايدي :
-تعالي معايا
مكنتش فاهمه هو رايح فين بس مشيت معاه وانا كلي امان أنه استحاله شخص في جمال قلبه يأذيني
وصلنا قدام محل ورد كبير قالي اقف استناه ثواني
شويه وخرج وهو شايل بوكيه ورد كبير لونه احمر وكله شوكلت
كان شكله يجنن ويخطف القلب في الحقيقه
قرب مني وهو بيبتسم :
-اتفضلي
عيوني لمعت بالدموع وانا باخده منه وبقربه مني وبشمه :
-شكله حلو اوي ياسليم
-الورد للورد ياقمر
-شكرا بجد شكرا اوي انا لاول مره اتبسط اوي كده
-يارب دايماً ،نمشي؟!
هزيت راسي بابتسامه رقيقه :
-نمشي
شبكنا ايدينا في ايد بعض ومشينا لحد البيت
اول ما وصلت لقيت ماما وعمو صلاح قاعدين مستنين رجوعنا
جريت علي ماما وانا مبسوطه :
-شوفتي ياماما سليم جابلي ايه
ماما بابتسامه غريبه :
-حلو أوي ياحبيبتي اتبسطتي؟
-جدا جدا
ماما بأمتنان :
-شكرا ياسليم
-متقوليش كده ياماما انا اللي حابب اشكر كنزي لاني فعلا كنت مبسوط اوي النهارده
ابتسمت بخجل وانا بحط وشي في الأرض …
-تصبحوا علي خير
-وانتي من أهل الخير
روحت علي اوضتي وكنت لسه هدخل بس هو وقفني
-كنزي
-نعم
-شكراً
-اتبسطتي؟؟
-فوق ما تتخيل
-بس مش اكتر مني
-بجد ياسليم
-لاول مره احس اني مبسوط كده
وقرب مني خطوه خلت قلبي يتنفض وانا ببصله بتوتر
مسك ايدي وانحني وهو بيبوسها برقه :
-تصبحي علي خير ياقمري
ابتسمت بخجل وانا برد بصوت مهزوز:
-و وانت من اهل الخير
-هو انا ممكن أسألك سؤال ؟
-اتفضل
-تتجوزيني
برقت عيني بصدمه وانا بحاول استوعب اللي قاله
-هه
-بمشاعري اللي مصدقها
وبعيني وصوتي وخطّي
“باتقدملِك بإرادتي”
واطلب ايدك تبقيلي
عُكّازي ونور قنديلي
وشريك بالنُص ف وقتي❤️
-انا ا انا ….
قاطعني بمرح :
-يبقي علي بركه الله يوم الخميس خطوبتنا
وفجأة سمعنا صوت ماما وهي بتزغرط
-لولولولولولولي الف الف مبروك ياحبايب قلبي
-ها موافقه
ابتسمت بخجل وانا بحط وشي في الأرض وبهز راسي :
-موافقه
صلاح بذهول :
-سبحان الله مين كان يصدق أن ناقر ونقير يحبوا بعض
ويخلق مالا تعلمون
ضحكنا كلنا على رد فعله وبعدها بصينا انا وسليم لبعض وقلوبنا كلها راحه وامان
وفي الحقيقه مفيش اجمل ولا احن من احساس الراحه والأمان مع شخص كان غريب عنك من كام ساعه بالتقريب!
ومن اليوم ده وانا قلبي بيحب سليم
اصل بصراحة كده هو يستاهل كل الحب اللي في الدنيا
انسان يشبهني في تفاصيلي
انسان يستاهل اسيب الكون
و اسيب الدنيا و اكون وياه
تمت