رواية شبه راجل كاملة جميع الفصول بقلم اسراء ابراهيم
رواية شبه راجل كاملة جميع الفصول هى رواية من تأليف المؤلفة المميزة اسراء ابراهيم رواية شبه راجل كاملة جميع الفصول صدرت لاول مرة على فيسبوك الشهير رواية شبه راجل كاملة جميع الفصول حققت نجاحا كبيرا في موقع فيسبوك وايضا زاد البحث عنها في محرك البحث جوجل لذلك سنعرض لكم رواية شبه راجل كاملة جميع الفصول
رواية شبه راجل كاملة جميع الفصول
انا عارف انها مالهاش ذنب بس انا كمان مليش ذنب في اللي اختها عملته في اخويا
كان بيتكلم يوسف بانفعال في التليفون ومكنش واخد باله ان كل كلمة قالها كانت سامعاها رقية مراته ،، كانت واقفة ماسكة الصنية اللي عليها قهوته وواقفة مصدومة وفهمت وقتها سبب معاملته اللي اتغيرت من بعد ما اتجوزو
رقية بدموع/ انت ملكش ذنب يا يوسف بس انا غير مليكة
يوسف بصدمة وهو بيلف وشه لرقية/ رقية انا اسف بجد ،، انا عارف انك ملكيش ذنب بس انا حاولت كتير انسي ومش قادر
رقية بسخرية/ كل يوم كنت بسأل نفسي ليه انت متغير معايا ،، ليه حتي محاولتش تقرب مني زي اي عريس يوم فرحه ،، كنت فاكرة انك خايف عليا ومستني اني اخد عليك بس شهرين عدو وانت كل مدي بتبعد اكتر ،، استحملت عصبيتك الزايدة بيني وبينك وقولت معلش اكيد مضغوط في شغله بس لحد هنا وخلاص بقي كفايا كدة يا يوسف لاني مستاهلش انه يحصل معايا كدة
يوسف بغضب / انتي بتتكلمي كأنك ضحية مجربتيش احساس انك تشوفي اخوكي بيتعذ*ب قدامك بسبب اختك اللي علقته بيها وفي الاخر سابته بكل برود
رقية بغضب اكبر / لا يا يوسف ،،انا مش بس شوفت انا كمان جربت ،، جربت اتجوز راجل كنت فاكرة انه بيحبني زي ما بحبه اتاريه انسان مريض اتجوزني عشان ينتقم مني لسبب انا مليش علاقة بيه
يوسف قرب من رقية ومسك ايديها بغضب وهو بيتكلم :
انا مش مريض ،،انا باخد حق اخويا من اللي اختك عملته فيه
رقية بو*جع / سيبني انت بتو*جعني
يوسف ساب ايد رقية فجأة وهو بيبصلها بندم بس هي بصتله بغضب وسابته وجريت علي اوضتها ونفخ وقتها هو بضيق
………………….
بلبل كان قاعد يوسف علي الكورنيش وهو بيفكر في الكلام اللي دار بينه وبين رقية واحساس الذنب مسيطر عليه ،حاجة جواه بتقوله انها فعلا مالهاش ذنب بس صورة اخوه بتخلي الغضب يتملك منه اكتر وحس الانتقام يزيد عنده فقرر انه ميضعفش ويستمر في انتقامه من رقية فقام بغضب ورجع البيت وعدي علي اخوه الاول في شقته واول ما فتحله عمر اتفاجئ بيه بيبتسم علي غير عادته
يوسف باستغراب وهو بيدخل شقة اخوه / خير يارب ،، مش واخد عليك بتبتسم كدة يا عمر ،،في حاجة حصلت ولا ايه ؟
عمر بفرحة/ ايوة يا يوسف ،، حاجة عمرك ما تتوقعها ابدا
يوسف بقلق/ايه الحاجة اللي مخلياك فرحان اوي كدة بعد ما كنت شبه ميت ؟
عمر باندفاع / مليكة كلمتني وطلبت مني ارجعها وقالتلي انها حست بغلطها وانها مش قادرة تعيش من غيري
يوسف بصدمة/ وانت هتعمل كدة فعلا ؟
عمر براحة/ طبعا ،، انا ماصدقت انها كلمتني ،، انت عارف انا عشت ازاي من غيرها يا يوسف ؟
يوسف بغضب / وعشان اللي عشته ده انت لازم ترفض ولازم تطردها من حياتك للابد يا عمر ،، مينفعش تبقي ضعيف اوي كدة قدامها
عمر برفض/ انا خلاص قررت ارجعها يا يوسف ،،المسامح كريم يا اخي وانا سامحتها
يوسف بصدمة/ انت ازاي بالسهولة دي تسامحها ،،ده انا كنت هتجنن عشانك وانا شايفك بتتعذ*ب بسببها وفي الاخر تسامحها بالسهولة دي ؟
عمر بابتسامة / يا حبيبي انا مقدر مشاعرك كويس وبعدين ما انت اتجوزت اختها اهو وعايش سعيد سبني بقي انا كمان اعيش سعيد بطريقتي
يوسف في باله / اه لو تعرف اني اتجوزتها عشان انتقم ليك ،، لو تعرف قد ايه عذ*بت رقية عشان اللي عملته اختها فيك
يوسف بجدية/ تمام يا عمر اللي انت شايفه صح اعمله ،،تصبح علي خير
……………………..
دخل يوسف شقته واتفاجئ برقية مستنياه وشنطة هدومها جمبها فبصلها يوسف بصدمة
يوسف باستغراب / ايه الشنطة دي ؟ ولابسة كدة ورايحة علي فين
رقية بهدوء / طلقني يا يوسف ولو سمحت توديني بيت اهلي
يوسف بهدوء/ ممكن تبطلي جنان يا رقية وتخلينا نتكلم بهدوء وعقل
رقية بو*جع /مفيش هدوء ولا عقل ،،لو سمحت طلقني ،، اعتقد اننا مينفعش نعيش مع بعض تاني بعد اللي عرفته ولا لسة في حاجة تاني عايز تعملها عشان تطفي النا*ر اللي جواك مني
يوسف باندفاع/ عمر هيرجع مليكة يا رقية
رقية بصدمة/ انت بتقول ايه ؟
يوسف بحيرة / زي ما بقولك ،، عديت عليه لقيته متغير 180 درجة ،،مش هو ده عمر اللي بقاله اكتر من اربع شهور عايش زي الميت بالظبط ،،كان في قمة سعادته ،،قالي انها كلمته وانها ندمانة ،، سامحها بكل بساطة بعد الو*جع اللي سببتهوله
فجأة رقية بقت تضحك بصوت عالي لدرجة ان يوسف بصلها باستغراب
يوسف باستغراب/ انتي بتضحكي علي ايه ؟
وقفت رقية ضحك وبصت ليوسف بو*جع وقربت منه وهي بتبصله بكر*ه
رقية بمرارة / شوفت ربنا عمل ايه ؟،، اثبتلك ان قضيتك اللي كنت متمسك بيها ولا اي حاجة ،، كنت عمال تقولي اخويا اخويا وانتقم عشانه وفي الاخر اخوك نفسه نسي و*جعه بمجرد ان مراته اللي هي اختي كلمته ،، جر*حت مشاعري وكرامتي عشان تنتقم لاخوك اللي ولا شغله اي حاجة من اللي انت بتعملها عشانه ،، شوفت انت قد ايه مريض يا يوسف ؟
يوسف بغضب وهو بيمسك ايد رقية/ اخرررسي ،، انتي فاكرة نفسك مين عشان تكلميني كدة ؟
رقية بغضب / انا ولا اي حاجة ،،انا واحدة حبت واحد ووثقت فيه بس للاسف طلع انسان ميستاهلش مجرد الكلام عليه ،، طلقني لو عندك كرامة يا يوسف
يوسف بغضب / وانا مش هطلقك يا رقية وهتفضلي هنا في سجني لحد ما يجيلي مزاجي اني اطلقك ،،وقتها هعمل كدة لكن دلوقتي علي اوضتك متخرجيش منها ،، يلاااا
جريت رقية بخوف علي اوضتها ويوسف وقف يبص للسما بحيرة وغضب من نفسه لانه عارف انه غلطان وانه بدل ما يصلح علاقته برقية بوظها اكتر فنفخ بغضب ووهو بيقعد وبيفكر هيعمل ايه
…………………..
تاني يوم فاق يوسف من النوم علي صوت جرس الباب فقام بتعب من الكنبة اللي نعس عليها امبارح وراح يفتح فاتفاجئ بحماه وحماته ففهم ان رقية كلمتهم عشان يجو ياخدوها
يوسف بتوتر/ اهلا يا عمي ،، اتفضلو
سعيد بابتسامة/ اهلا يا يوسف ،،ازيك يا حبيبي ،،انت كنت خارج ولا ايه
بص يوسف لهدومه اللي لابسها من امبارح ورد بتردد/ كويس يا عمي انا كنت نازل الشغل اه بس مش مهم انهاردة بقي
كريمة باستغراب / اومال رقية فين ؟
يوسف كان هيتكلم ويقول ان ده سوء تفاهم بس قاطعته رقية اللي خرجت بسرعة وهي لابسة فستان حلو اوي عليها وكمان حاطة ميكب خفيف حاولت تداري بيه دموعها
رقية بابتسامة / ازيكم يا بابا انت وماما ،،وحشتوني اوي ،،كدة تغيبو عني كل ده ؟
فهم يوسف ان اهل رقية جايين صدفة فاتنهد براحة
يوسف بابتسامة/ فين يا رقية العصير ،،كدة باباكي ومامتك يقولو علينا بخلا
رقية بابتسامة/ طبعا احلي عصير هيجهز حالا ،،بعد اذنكم
سابتهم رقية ودخلت المطبخ ويوسف شوية ودخل وراها
يوسف بهدوء/ افتكرتك كلمتيهم عشام يجو ياخدوكي
رقية من غير ما تلف وشها / متفرحش اوي عشان انا همشي معاهم
يوسف برجاء وهو بيقرب من رقية/ رقية لو سمحتي متعمليش كدة ،،خليكي معايا واديني فرصة اعوضك عن اللي حصل مني
رقية بو*جع وقلب مكسو*ر/ تعوضني ؟ ،، تعوضني عن ايه ؟،، عن صدمتي فيك ولا عن كدبك عليا ؟ ولا عن ايه ولا ايه ،، يوسف انت مش بس متستاهلش فرصة تانية ،،انت تستاهل اني اندم عليك عمري كله ،، طلقني يا يوسف
قالت رقية كلامها وسابت يوسف وخرجت بالعصير ووقتها يوسف نفخ بغضب وهو بيشد شعره بحيرة وبعدين خرج هو كمان
منير ابو رقية بتردد/ والله يا رقية يا بنتي انا كنت جاي وخايف احسن يكون يوسف بيعاملك معاملة مش ولابد بسبب اللي حصل بين اخوه واختك بس لما شوفنا معاملته دي اتأكدت انه فعلا راجل ويستاهلك يا بنتي
يوسف بص لرقية بندم وبصتله هي بو*جع ودورت وشها
رقية بهدوء/ لا يا بابا يوسف مش كدة ابدا ،، طب تخيل انه قالي دلوقتي جوة ان هو حاسس انكم واحشني وطلب مني امشي معاكم واقعد كام يوم
منير بفرحة/ تنوري بيت ابوكي يا حبيبتي ،،والله يا يوسف يابني انت تستاهل كل خير ،، ربنا يخليك ليها يابني
يوسف ببهتان/ شكرا يا عمي
كان بيتكلم يوسف وهو بيترجي رقية بعنيه بس هي اتجاهلته وقامت بسرعة
رقية بابتسامة / هروح احضر شنطتي
منير بفرحة/ ماشي يا رقية يا بنتي ،،اهم حاجة ان جوزك راضي ولا ايه يا يوسف
يوسف بحزن/ طبعا يا عمي ،،يومين ان شاء الله واجي اخدها
منير بموافقة / ان شاء الله يابني
…………………….
عدي كام يوم كان يوسف هيتجنن من غياب رقية عنه وخصوصا انها حتي مكالماته مش بترد عليها وده خلاه هيتجنن ويسمع صوتها واتأكد انه حبها اوي وانها فعلا سكنت قلبه ،، انهاردة قرر يروح يجيبها مهما كلفه الموضوع بس المهم انها تديله فرصة فخبط عالباب وشوية وفتحتله صبرين ام رقية
صبرين بود/ اهلا يا يوسف يابني اتفضل
يوسف باحراج/ شكرا يا طنط ،،اومال رقية فين ؟ اقصد يعني رقية وعمي منير
صبرين بتفهم/ عمك منير تحت بيصلي في الجامع وزمانه جاي ورقية في اوضتها هبلغها انك هنا حالا
كان قاعد يوسف متوتر وقلقان من رد فعل رقية وقرارها اللي اخدته بانها تبعد لحد ما انتبه علي صوتها
رقية بهدوء/ جبت ليه يا يوسف ؟
يوسف فام وبص لرقية بلهفة / جيت عشانك ،، عشان نروح بيتنا
رقية بسخرية / بيتنا ؟ ،، تقصد بيتك اللي عملته عشان يشهد علي ايام انتقامك فيا مش كدة ؟
يوسف بندم/ وانا قولتلك اني ندمت يا رقية ،،انتي ليه مش قادرة تصدقيني
رقية بتردد / عشان مش حمل اني اتجر*ح تاني منك يا يوسف ،، انا غصب عني مش قادرة اصدق انك فعلا بتحبني بجد وانك ندمت علي اللي حصل ،، انا خايفة اسلملك قلبي وارجع اندم
يوسف بثقة/ الكلام ده كان زمان يا حبيبتي ،،لكن انا اتعلمت الدرس يا رقية وعايزك تديني فرصة تانية
رقية بتفكير / موافقة بس بشرط
يوسف بلهفة / موافق من غير تفكير
رقية باصرار/ لازم برضه تعرفه الاول قبل ما تقرر اه ولا لا
يوسف بتنهيدة/ ماشي يا ستي ،،اتفضلي قولي انا سامعك
رقية بهدوء / عاوزة نمشي من الشقة دي ونروح شقة تانية بعيد عن اخوك واختي ممكن ؟ وتوعدني ان حياتنا تبقي مستقلة بعيد عنهم وعن مشاكلهم
يوسف بثقة / موافق طبعا واوعدك خلاص اننا نبقي مستقلين بحياتنا ،، ها بقي ،، لسة مصممة تسبيني
رقية بابتسامة/ لسة مصممة اكون جمبك يا يوسف
يوسف بعشق/ تسلميلي يا احلي حاجة حصلتلي في حياتي ،، هسيبك بقي وامشي ويومين بالظبط واجي اخدك علي شقتك الجديدة ،،ايه رأيك ؟
رقية بفرحة/ موافقة
……………………..
عدي اسبوع كانت رقية فيه حالتها متغيرة تماما عن اول ما جت عند اهلها ،، بقت تضحك وتهزر مع اختها وامها وفرحانة اوي وامها كانت ملاحظة ده بس لاحظت برضه انها بقالها يومين بنفس حالتها اول ما جت بقت زعلانة ومضايقة ومتوترة من اقل حاجة وعشان كدة قررت تتكلم معاها
صبرين باندفاع/ ماهو انتي لازم تفهميني بقي في ايه بالظبط ؟
رقية بانتباه/ خضتيني يا امي ،، حضرتك بتتكلمي علي ايه بالظبط ؟
صبرين بقصد/ رقييية ،،انتي فاهماني كويس انا بتكلم علي ايه ،، اول ما جيتي معانا كنتي حزينة ومضايقة وبتعيطي بليل في اوضتك وبتصحي عيونك منفخة ولا كأنك جاية غضبانة ومن بعد ما يوسف جوزك جه هنا واتكلمتو سوا وبعدين مشي وانتي حالتك اتغيرت مية وتمانين درجة وهزار وضحك واهو كام يوم وقلبتي تاني ايه اللي جرالك فيه ايه ؟
رقية بصت لامها بحزن وفجأة حضنتها وبقت تعيط بحرقة
صبرين بلهفة / بسم الله عليكي ،،مالك يا بنتي متو*جعيش قلبي عليكي وقوليلي في ايه ،،ده انا امك وسترك وغطاكي
رقية بدموع/ يوسف بقاله يومين مش بيرد علي مكالماتي يا امي ،، كان المفروض يجي ياخدني من يومين بس مجاش وانا خايفة اوي
صبرين باستغراب/ طب وفيها ايه يا حبيبتي ما جايز مشغول ولا في حاجة عطلته
رقية بنفي وهي بتحرك راسها يمين وشمال / لا يا امي ،، يوسف كان بيكلمني كل يوم وكذا مرة بس فجأة كدة يقطع ،،انا قلبي مش مرتاح وخايفة
صبرين بحزن/ انا معرفش ايه اللي صابكم يا بناتي ،،واحدة كل شوية بحالة وبعد ما ربنا هداها وقالت هترجع لجوزها رجعت قالت مش عايزاه ومش هرجعله والتانية قاعدة جمبي ومش عارفة فيها ايه
انتبهت رقية لكلام امها اللي قالته فبرقت بصدمة
رقية وهي علي نفس صدمتها/ انتي قولتي ايه يا ماما ؟،، هي مليكة اتخانقت تاني مع عمر وقالت مش هترجعله …
↚
صبرين بحزن/ ايوة اختك بقالها كام يوم معاندة وتقولك مش هرجعله معرفش مالها دي ،، بعد ما قولنا خلاص ربنا هداها ،،انا شاكة انها محسودة البت دي والله
مكنتش مركزة رقية في باقي كلام امها وكل تفكيرها ان سبب غياب يوسف عنها وتأخيره عليها وعدم رده علي تليفوناتها هو اللي حصل بين اخوه واختها وانه رجع تاني يكر*هها فغمضت رقية عنيها بخزلان ودموعها نزلت بصمت وصدمة في اغلي انسان في حياتها وتاني يوم كانو قاعدين كلهم عالسفرة بيتغدو بس رقية كانت في عالم تاني مش معاهم بس فجأة اتكلمت
رقية باندفاع/ بابا ،،انا عاوزة اطلق من يوسف
منير بتنهيدة/ انا كنت حاسس ان الموضوع في حاجة غريبة ،، تعالي يا رقية نتكلم جوة لوحدينا
دخلت رقية وابوها اوضتها ووقفت قدامه واتكلمت وهي بتحاول تتمالك نفسها
رقية بهدوء/ لو سمحت يا بابا طلقني منه ،، انا مش عاوزاه البني ادم ده
منير بهدوء /وده كله بسبب علاقة اخوه باختك مش كدة ؟
رقية بدموع/ ايوة يا بابا
منير بتفكير / احكيلي كل حاجة حصلت ومتخبيش حاجة يا رقية وانا هتصرف يا بنتي
اتنهدت رقية بحزن وبدأت تحكي لابوها كل حاجة حصلت معاها من يوسف من اول ما سمعت مكالمته مع صاحبه عن انتقامه منها لحد ما جه هنا ووعدها انه هيتغير وانه مش هيسمح لعلاقة اخوه باختها انها تأثر عليهم
منير بسخرية/ وطبعا مجاش زي ما وعدك عشان اختك قالت خلاص مش عاوزة اخوه ،، ده انسان مريض يا بنتي وميستاهلش انك تبكي عليه ،،متقلقيش انا هخلص الموضوع ده كله و
فجأة قط*ع كلام منير صوت صبرين العالي
صبرين بلهفة/ يا مراري يا بنتي ،،الحق يا منير الحق
خرج منير بسرعة ووراه رقية اللي شافت ابوها بيقرب من واحد واقف قدام باب الشقة ومعاه ورقة بيديها لابوها
الراجل بجدية/ دي ورقة طلاق باسم رقية منير اسماعيل
رقية فجأة شهقت بحزن ومحستش بحاجة تاني بعدها غير والدنيا بتسود قدام عنيها
…………………….
عدي ست شهور من ساعت اللي حصل كانت رقية فيهم حالتها سيئة لابعد حد ،،كان صورة يوسف قدام عنيها كل ما تغمض وتنام ودايما بتحلم بيه وهي بتعاتبه علي اللي عمله فيها وانها مالهاش ذنب في اي حاجة ،، كانت قاعدة رقية في اوضتها وسامعه امها وهي بتكلم عمتها برة بصوت واطي وهي فاكرة انه مش واصل لرقية بس كانت سامعة كل حاجة ومقهورة بكل حرف
صبرين بحزن/ منه لله البعيد ،، البت مكنتش تستاهل منه كل ده ،، انا والله مكنتش عاوزة البدل ده من الاول بس ابوها قال عادي ومش هيحصل مشاكل ،،اهو طلقها ورماها يا عين امها بذنب اختها مع اخوه ،،حسبي الله ونعم الوكيل
يسرية بهدوء/ خلاص يا صبرين ،،اللي حصل حصل وبنتك بكرة يجيلها احسن منه ،،والله انا كنت اتمني تكون لخالد ابني بس هي بقي وافقت باللي ما يتسمي ده ،، يلا النصيب ،،ربنا يعوض عليها
في اوضة رقية كانت بتسمع كلام امها وعمتها وهي بتعيط بصمت لحد ما فجأة اخدت نفس طويل وقامت بصت في المراية وكأنها بتتحدي نفسها
رقية بثقة/ انا مش هضعف تاني ولا هسمح لحبه يضعفني ،، هو مكنش يستاهلني عشان كدة ربنا بعده عني ،، من بكرة هبقي واحدة تانية غير رقية الضعيفة
……………..
↚
غيرت رقية هدومها ولاول مرة تخرج من اوضتها وهي بتبتسم بهدوء
رقية بابتسامة / ازيك يا عمتو
يسرية بفرحة/ الحمد لله يا ست البنات ،،ايوة كدة اوعي تخلي حد يشمت فيكي ،،خليكي طالعة لعمتك
رقية بضحك/ وهو انا اطول اطلعلك يا عمتو يا قمر انتي
يسرية بحب /والنبي انتي اللي قمر يا بت يا رقية
قطع كلامهم جرس الباب فراحت رقية تفتح وهي فاكرة انه ابوها بس اتوترت لما لقت انه خالد ابن عمتها
خالد باحراج وهو بيبص للارض/ ازيك يا رقية ،،اسف لو جيت فجأة من غير ما اتصل بس امي تليفونها مقفول هي ومرات خالي
رقية بابتسامة / ولا يهمك يا خالد ،،اتفضل
دخل خالد بسرعة وهو بيحاول يبعد عنيه عن رقية
خالد بعتاب/ بقي كدة يا امي ،، كام مرة رنيت عليكي وتليفونك مقفول انتي ومرات خالي
صبرين باسف/ معلش يا خالد يابني دي غلطتي ،،اصل التليفونات فصلت وانا حطيتهم عالشاحن
يسرية بخبث / معلش بقي يا خالد يابني اهو ليك نصيب تشوف مرات خالك وبنت خالك القمر
خالد باحراج / احم ،،هو خالي فين اومال ؟
صبرين بابتسامة / زمانه علي وصول ،،اعملي الشاي يا رقية
رقية بابتسامة / سُكرك ايه يا خالد ؟
خالد بهدوء / مظبوط يا رقية لو مش هتعبك معايا
رقية بابتسامة رقيقة/ تعبك راحة ،،بعد اذنكم
دخلت رقية وخالد اتنهد تنهيدة طويلة فغمزت يسرية لصبرين ففهمت وبصت لخالد بتفكير
صبرين بابتسامة / بقولك يا خالد يابني ،،ادخل قول لرقية ان عمتها عايزة قهوة مش شاي
خالد باحراج/ حاضر يا مرات خالي
دخل خالد المطبخ ولقي رقية بتعد حبات السكر اللي وقعو منها علي الترابيزة فضحك بصوت علي شكلها وهو بيبص في الارض ووقتها اتكسفت رقية وهي بتبصله بخجل
رقية بخجل/ انا كنت بتسلي علي ما المية تغلي
خالد بابتسامة / منا عارف اكيد يعني مش بخيلة وبتعدي علينا السكر مثلا
رقية باندفاع/ والله العظيم لا ابدا
خالد بضحك وهو بيرفع وشه / منا عارف متقلقيش
اتوترت رقية من ابتسامة خالد الجذابة وبصت بعيد بخجل
خالد باحراج / انا كنت جاي عشان اقولك ان ماما عايزة قهوة مش شاي
رقية بابتسامة/ حاضر هعملهالها حالا
خالد بهدوء / هو انا لو طلبت منك طلب ممكن تعمليهولي
رقية باستغراب/ طبعا اتفضل
خالد بتردد/ لو ممكن يعني الشاي بتاعي انا يبقي سكر ذيادة بس من غير ما يتعد الله يكرمك
رقية ابتسمت بتلقائية وفهمت انه يقصد كلامه ده لانها كانت بتعد السكر وتابعته وهو بيخرج من المطبخ وعلي وشها ابتسامة غريبة
……………………
↚
عدي فترة ورقية كانت بتدور علي شغل عشان ترجع تشتغل وتستقر تاني فعملت كذا مقابلة في يومها وكله بينتهي بجملة واحدة ،، هنكلمك في اي وقت وده كان بيحبط رقية اكتر ،، كانت قاعدة مستنية دورها في اخر مقابلة وكانت متوترة وقلقانة لحد ما اتفاجأت بخالد داخل علي السكرتيرة بورق وبيديهولها فكانت متابعاه بعنيها وهو بيتكلم
خالد بجدية / الورق ده تبعتيه فاكس للشركة وتستني ردهم وبعدين تبعتيلي الرد بتاعهم باسرع وقت فاهمة ؟
السكرتيرة بطاعة / حاضر يا استاذ خالد
خالد لف عشان يمضي بس اتفاجي برقية فقرب منها بسرعة
خالد بابتسامة/ رقية ازيك ،، انتي بتعملي ايه هنا ؟
رقية باحراج / انا بقدم علي شغل وهعمل مقابلة شوية كدة ،، هو انت بتشتغل هنا ؟
خالد بابتسامة / انا شريك في الشركة بنسبة خمسين في المية ،، تعالي ورايا
ابتسمت رقية بأمل وراحت بسرعة ورا خالد اللي دخل مكتب كبير انبهرت بيه رقية
رقية باندفاع/ هو ده مكتبك يا خالد ؟
خالد بصلها شوية وهو بيحاول يهدي نفسه من اللي حصله من مجرد ما نطقت رقية اسمه / احم ،، اه مكتبي ،، اتفضلي اقعدي
رقية وهي بتقعد/ طيب هو انا هشتغل ؟ انا بس مش عاوزة اشتغل بواسطة وكدة
خالد باستغراب/ مين قالك انك هتشتغلي بواسطة ،، انتي هتعملي انترفيو معايا
رقية بتوتر / ربنا يستر
فضل خالد يسأل رقية شوية اسأله وهي تجاوب بتوتر لحد ما قفل خالد الملف بتاعها
خالد بابتسامة / مبروك ،،انتي معانا
رقية بفرحة/ بجد والله ؟،، انا متشكرة اوي يا خالد ،،اقصد يا استاذ خالد
خالد بابتسامة / انتي الوحيدة اللي مسموحلها تقولي خالد بس ،،احم عايزة عمتك تنفخني ولا ايه ؟
ضحكت رقية بخجل وفضلت تتكلم مع خالد بتلقائية وراحة حسيتها معاه وهو كمان كان بيتعامل معاها ومن جواه فرحان بالقدر اللي جمعهم سوا
…………………..
عدت فترة علي رقية وخالد وهما تقريبا بيشوفو بعض كل يوم وده خلاهم يقربو من بعض اكتر ويعرفو بعض اكتر ،،وخصوصا خالد اللي كان سعيد بقربه من رقية فكان زي ضلها في كل مكان وكان اهم اهتماماته هو انه يخليها تثق في نفسها اولا وبعدين فيه لانه كان ملاحظ توترها وخوفها من اي جديد ،، انهاردة كانو مروحين سوا بعد الشغل فكانت رقية فرحانة لانها قبضت اول مرتب بعد تعب كام شهر في الشغل تحت التدريب اولا وبعد كدة شغلها هي
خالد بابتسامة / انا شايفك فرحانة اوي انهاردة
رقية بفرحة/ طبعا يا خالد ،،ده اول مرتب ليا ،،حاسة ان انهاردة بس اتولدت من جديد واقدر اني ارجع لحياتي تاني
خالد بثقة/ وانا جمبك يا رقية ،، ومش عاوزك تشيلي هم اي حاجة طول منا جمبك
رقية بإبتسامة / انا بجد مهما عملت مش هقدر اوفي جميلك عليا يا خالد
خالد بعتاب/ جميلي ؟،، بقي انتي شايفة وقفتي جمبك جميل يا رقية مكنتش متوقع من تقولي كدة
رقية بندم/ اسفة يا خالد ارجوك متزعلش مني لو سمحت
خالد بابتسامة / اممم طيب ماشي بس بشرط ،،تعزميني علي اكله حلوة كدة
رقية بحماس / طبعا موافقة
…………………….
↚
كانو قاعدين في المطعم بيهزرو ويضحكو من غير ما ياخدو بالهم من العيون اللي مراقباهم بغضب وغيرة وندم ،،هو يوسف ،،اللي الصدفة جمعته برقية في المطعم وخليته يشوف بعنيه قد ايه هي خلاص اتخطت غيابه وحبها ليه وبقت مع غيره اما رقية فمكنتش واخدة بالها منه ولا شايفاه وهو متابعها
رقية بابتسامة / انا عمري ما كنت سعيدة قد انهاردة
خالد باندفاع/ افهم من كدة اني انا سبب سعادتك ولا المرتب ؟
رقية بخجل / لولاك مكنش هيبقي فيه مرتب
خالد بتوهان/ ولولا انتي معايا دلوقتي مكنتش هكون اسعد راجل في الكون كله زي منا كدة دلوقتي
رقية اتوترت وقلبها دق وبصت بعيد بخجل بس فجأة شافت يوسف قدامها ،، قلبها اتقبض ورجعت بصت لخالد اللي استغرب شكلها فبص مكان ما بصت وشاف يوسف بيقرب عليهم
يوسف بابتسامة / انا شايف انك لحقتي تنسي بسرعة اللي بينا يا رقية ،،اومال ايه بقي حبيتك وجر*حتني والجو ده
رقية عنيها دمعت وحست انها ضعيفة اوي قدامه لانها مش قادرة تسيطر علي دموعها بس اتفجأت بخالد بيقرب منها وبيحاوطها بايديه وبيتكلم وهو بيضمها لحضنه
خالد بغضب / انت لو فكرت توجه لمراتي كلمة ذيادة انا هخليك تندم باقي عمرك ،،يلا من هنا احسنلك والا انا مش مسئول علي اللي هيحصلك
يوسف كان مصدوم ومش مصدق انها فعلا اتجوزت تاني بعده لانه لحد اخر لحظة كان عنده امل انها تسامحه اما رقية فقلبها دق اول ما خالد قال كلامه واعلن ملكيته ليها وقال انها مراته وده خلاها تحس بالامان اوي والثقة اللي خليتها ترد علي خالد وهي بتبص ليوسف بلا مبالاه / خلاص يا حبيبي ،، سيبك منه ،،ده واحد مريض فاكر الدنيا كلها هتقف عشانه
اتعصب يوسف ومشي بغضب بس خالد كان في عالم تاني من كلمة حبيبي اللي قالتها رقية بعفوية وبراءة خطفت بيها قلبه لدرجة انه محسش بنفسه وهو متبت فيها لسة حتي بعد ما يوسف مشي
رقية بخجل / خالد سيبني ،، هو خلاص مشي
خالد باحراج وهو بيبعد/ اسف يا رقية بس من فرحتي محستش بنفسي
رقية بخجل / فرحتك بايه ؟
خالد بتوهان / كلمة حبيبي اللي اتقالت دي انتي متعرفيش عملت فيا ايه
رقية بتوتر وخجل/خالد انا يعني
خالد باندفاع وهو بيمسك ايديها / تتجوزيني يا رقية ؟ انا عارف انك لسة جر*حك يمكن مخفش ،، بس صدقيني هكون اسعد انسان في الدنيا لو وافقتي تأمنيني علي قلبك ،،وقتها اوعدك اني احافظ عليه لانه حلم عمري اللي ياما حلمت انه يكون ليا ولما افتكرته ضاع رجعلي تاني من جديد ومش عاوزه يضيع تاني مني وصدقيني انا ..
رقية بابتسامة رقيقة / موافقة يا خالد وانا متأكدة انك عمرك ما هتخليني اندم ،، وصدقني انا بقولك كدة بعقلي وقلبي وانا متأكدة انك العوض اللي كنت مستنياه وانك راجل بجد مش شِبه راجل
خالد بفرحة / يسلملي عقلك وقلبك يا نبض قلبي
تمت